لون الحياه ئي ليه كدا

سلام الله عليكم

سؤال تقريبا بسأله كل فتره لبعض الناس , هى الحياه كدا ليه بقه ليها لون تانى

بس مش اللون اللى كانت تقصده المغنيه في فيلم انت عمرى , مش لون حلو ابدا ولا لون يبعث على السعاده او الفرحه

الحياه بقت تتسم باللون الرمادى ولو حصل ان اللون فتح شويه هايتحول من رمادى قاتم لرمادى غامق من سوء لأسوأ

كل ما الايام تعدى كل الظروف تتصعب والحياه تبقه اقسى و اكثر ايلاما , بقينا نشوف الصح ونقول عليه غلط

والغلط بقه هو الصح بعينه

بقينا بنكدب الكدبه ونصدقها , واذا حد واجهنا بغلطنا وبكدبتنا بنثور عليه ودا ويطلع انسان جاهل ومابيفهمشي حاجه و مدسوس علينا علشان ينغص علينا حياتنا اللى هى اساسا مش ناقصه

بقينا بنكدب وبنخون وبنقتل وبنسرق وكل دا له مبرر ومبرر واضح وماينفعشي معاه نقاش

زي دكتور الجامعه اللى شرح واحد اخد منه 70000 ومش رد ليه الفلوس ومالاقاش طريقه لاستعادة فلوسه غير انه يشرحه وبيرد بكل ثقه واحد اخد منى فلوسي ومش راضي يردها يبقه لازم اقتله ولا لأ؟؟؟

الروح بقت اهون شيء عندنا , لو مات 1000 شخص عادى قضاء وقدر , لكن لو ضاعت فلوس او اتسرق بنك تقوم الدنيا ولا تقعد

مين قال ان الاف يموتوا في حادث غرق عباره والمتسبب في الحادث يطلع براءه

ومفروض نصقف للقضاء المصرى العادل , اخد حق كل غريق وكل واحد مات محروق

وجايز يطلعوا هما الى غلطانين

ولا مجلس الشورى اللى اتحرق وبيلموا تبرعات علشان يبنوه , الحكومة اللى تقدر تبنى عشرات المبانى زيه واكبر منه بتلم فلوس علشان تبنيه ومفروض الشعب يتبرع

الجبل اللى وقع على الناس والناس هما اللى غلطانين علشان سكنوا في منطقه فيها انحدار وعشوائيات , طب وهى العشوائيات جت منين مش بسبب الحكومه اللى مش قادرة توفر للناس دى مساكن ؟؟؟

وطبعا لازم في كل كارثه تحصل لازم نطلع احنا السبب.. الشعب

دا احنا حتى بينا وبين بعض بقينا بناكل في بعض وبنيجى على الضعيف وننصر الظالم

بقينا بنغش وبنكدب على بعض , بنخون ثقه بعض ,

مافيش شيء بقه اسمه ود وتراحم ومحبه بين الناس زى زمان

ولا حاجه اسمها اخوه او صداقه زى ما متوقع من معنى الكلمات دى

بقينا اهون على بعض من اى شيء , سهل اوى نبيع سهل اوى نضرب في الخلف , سهل نخون الثقه , سهل نخيب امال بعض , لو اعتمد عليك حد سهل انك تخون ثقته وتخليه يعتمد على حيطه مايله , لو حد مد لينا ايد المساعده ممكن اوى ندبح الايد دى او نجرحها ,

احنا فعلا فقدنا الاحساس ببعض , ماحدش بيحس بالتانى ولا بيقدره ودايما كل واحد فينا هو الصح والتانى هو اللى غلط , صعب اننا نعترف بخطأنا , ولو اعترفنا بنعترف واحنا متكبرين على الخطأ ومش قاصدنا وماتكبرشي الامور بقه انا ماقصدتش كدا انت اللى بتفهمنى غلط

وياما بيحصل من ورا انت بتفهمنى غلط ,

وفى الاخر أرجع وأسأل نفس السؤال:

هى الحياه كدا ليه بقه ليها لون تانى؟؟؟؟؟؟ ؟؟؟؟؟؟؟؟؟؟ ؟؟؟؟

احيك على موضوعك ده
بس احب اقولك انو الحياة عمرها مبتتغير
الحياة هي الحياة
بس احنا الي بنتغير
وللاسف بنتغير للاسوء
يبقى بلاش نحط العيب على الحياة
ولا على الزمن
عشان الحياة هي الحياة
والزمن هو الزمن
تقبل مروري

صح كمان احنا اللى بادينا نغير
الحياه والزمن ونغير نفسنا كمان

نااااااااااايس توبيك مولتووووووو
وخلينا نشوفك بقى

جميل يا مولتو
وانا رأى معاكم
ان الحل بأيدينا احنا
تحياتى ليك

بقينا بنغش وبنكدب على بعض , بنخون ثقه بعض ,

مافيش شيء بقه اسمه ود وتراحم ومحبه بين الناس زى زمان

ولا حاجه اسمها اخوه او صداقه زى ما متوقع من معنى الكلمات دى

انعدام اخلاق وبعد عن ربنا سبحانه وتعالى

انما الامم الاخلاق ما بقيت فاذا ذهبت اخلاقهم ذهبوا

احيكم علي رايكم
ويالا ايدي في ايديكم ونشوف ازاي هنغيرها
كلنا بنقدر نتكلم ونعبر ونقول ان العيب مش هنا لا العيب هنا يبئي بلاش نقرب منه
واحنا اصلنا عايشين فيه
ماهو فعلا احنا الي بنتغير مش الزمن ولا الحياه
بس ليه نتغير للاسوء مدام الخير ظاهر قدمنا
هرجع واقول اننا بقينا بنفكر في نفسنا وبس
ومحدش عنده القدره لاسعاد الغير
علشان لما يسعد نفسه الاول
يبئي يسعد غيرو
انا معاكم لو شايفين الغلط فين وقدرين تغيرو
بس ما اظنش خاالص

تحياااتي للجميع

الموضوع اكثر من رائع

لكن اظن المشكلة تكمن فى ان ناس كتير بتقدر تشخص مر ض الحياه اللى احنا عايشينها وبيجدوا العلاج لكن عند تنفيذ تلك الحلول ياما يختلفوا على الحل الأمثل للمشكلة أو يقولوا ياه هى جات علينا احنا اللى هنحلها كل واحد عايز غيره يبدأ الاول وفى كلتا الحالتين بينتهى بينا الحال للاسواء والأغمق فاالأغمق ومابيبقاش ليها لون تانى

» علمتني الحياه
» مدرسه الحياه
» اصعب لحظات الحياه
» ماذا تعلمت من مدرسة الحياه